Nitti minutt utan pause! er eit intenst skrivekurs for ungdom. Eg har basert kurset på fagbøker om tema, deltaking på kurs sjølv, og ikkje minst: prøve- og feilemetoden ute i skular over heile landet.
Eg startar økta med ei kort innleiing med tilpassa skrivetips. Etterpå får elevane konkrete oppgåver der eg velger tematikk - her vil eg tilpassa oppgåvene til alder og geografi. Tekstane skal vere fiksjon, men eg oppfordrer dei til å bruke av seg sjølv og eigne erfaringar i diktinga. Eg understreker at dette ikkje er ei rettskrivingskonkurranse, for mange stoppar skrivinga opp dersom dei lurer på korleis eit ord skal stavast. Det betyr ingenting her! Lærarane får ikkje lov å rette eventuelle grammatiske feil!
Etterpå må elevane lese opp (eventuelt kan læraren gjere det) og tekstane skal diskuterast - med både ris og ros. Her er sjølvsagt elevdeltaking sterkt ønskeleg frå mi side. Lærarar som kjenner elevane må vere med under absolutt heile kurset!
Målet er å pirre den kreative delen av hjernen. Og gi elevane eit bevisst forhold til språket sitt. Lesing og skriving er dalande ferdigheiter hos ungdom i dag. Dette kurset kan hjelpe dei til å få eit betre forhold til begge deler. Eg har gjort dette kurset mange gonger, og opplevd alt frå tårevåte og rørande forteljinga frå flyktningar, til nitti minutt med latter. Eg veit aldri kva eg går til, men rammene som eg har laga rundt gir elevane tryggleik til å skrive det dei vil, og mange får det motet dei treng til å lese opp.
Tor Arve Røssland debuterte som forfattar i 1999 med den humoristiske barneboka Pode, og har sidan den gong gitt ut ei rekke bøker for barn og ungdom. Han har skrive grøssarar i serien Svarte-Mathilda, dystopisk science-ficton i Soledad, og krim i bøker som Gamer og Snatch. Han likar heile tida å utforske nye sjangrar.
Han seier sjølv at han likar å skrive bøker som han likar å lese, heilt uavhengig av kven bøkene måtte passe for når dei kjem ut.
I barndomen sprang han etter sauer på Røsslandsgarden, som ligg midt mellom bygda Sunde og industristaden Husnes. I nabohuset budde besteforeldra hans, og i nabohuset deira budde oldefar. Han leika utandørs med venner og syskenborn heile sommaren. Når det var dritvêr sat han inne og leika med Lego eller spelte dataspel på Commodore 64. Han høyrte mykje på radioteater og høyrespel. Han begynte eigentleg ikkje å lese bøker før han var i 13-14 årsalderen, men etter det las han mykje, og han har aldri tenkt å slutte!
Då han såg ET – The Extra Terrestrial på kino i 1982, fann han ut at å dikte historiar var noko han likte. Han fantaserte om å bli verdsberømt Hollywoodregissør, men då han fann ut kor mykje strev det var å lage film slo han seg til ro med diktekunsten.
Av utdanning har han blant anna hovudfag i filmvitenskap frå Universitetet i Trondheim, samt mellomfag i litteraturvitenskap og mediepedagogikk.
I tillegg til bøkene har han skrive skodespelet Huldra, som Vestlandske Teatersenter har sett opp heile to gonger.
