Visjon og strategisk plan 2024–2027

Norsk Forfattersentrum skal vere ein uavhengig organisasjon som sørgjer for meir, god og ordentleg honorert formidling av eit breitt spekter av litteratur av høg kvalitet til lesarar i heile Noreg.

Vi skal vere den største, viktigaste og mest synlege aktøren innanfor forfattarformidling i Noreg. Dette skal vi oppnå ved å:

• skulere dei litterære arrangørane og profesjonalisere medlemmene med omsyn til å skaffe seg og gjennomføre litterære formidlingsoppdrag
• auke kjennskapen til og bruken av forfatterkatalogen.no, løfte fram aktuelle forfattarar, gjere det lettare for arrangørar å søkje etter emne og leggje til rette for at medlemmene jamleg oppdaterer profilane sine
• vidareutvikle avdelingskontora som ein fysisk møteplass for medlemmene og dyrke ein organisasjonskultur som skaper låg terskel for å ta kontakt
• framheve avdelingskontora sin kompetanse og rolle som regionale aktørar
• skape ein årleg møteplass for arrangørar, forfattarar og litteraturbransjen på eit nasjonalt nivå, som skal styrkje litteraturmiljøet og nærskylde bransjar
  

Vi skal kjempe for medlemmenes økonomiske, sosiale og opphavsrettslege rettar, for solidaritetsprinsippet og trygge arbeidsvilkår. Dette skal vi oppnå ved å:

• justere minstesatsene slik at dei minst følgjer inntektsutviklinga i samfunnet elles
• arbeide for at alle litterære og digitale presentasjonar skal løyse ut vederlag for bruk av tekst og illustrasjon
• motarbeide forventingar om gratisarbeid, anten det kjem frå eigne forlag, arrangørar, bokhandlarar, podkastprodusentar eller andre
• ha gode varslingsrutinar for forfattarar som opplever uønskt åtferd, som ulike former for diskriminering, rasisme og seksuell trakassering
  

Vi skal forsvare ytringsfridommen og lesingas betyding for eit fungerande demokrati. Dette skal vi oppnå ved å:

• stimulere leselysta gjennom gode og levande litterære møte mellom eit breitt samansett og mangfaldig publikum og forfattarar innanfor alle sjangrar
• sjølv ta initiativ og hovudansvaret for dei litteraturpolitiske sakene som er direkte relevante for litterær formidling, men også støtte dei andre skribentorganisasjonane i arbeidet for å styrkje den norske litteraturpolitikken
• tileigne oss kunnskap om konsekvensar av ny teknologi, som til dømes kunstig intelligens, og dei utfordringar og moglegheiter dette kan skape for litterær formidling
• bidra til synleggjering og formidling av litteratur på dei offisielle skriftspråka, samt urfolksspråka og dei nasjonale minoritetsspråka
• synleggjere at Norsk Forfattersentrum er ein sentral del av den litterære infrastrukturen og arbeide for å auke statsstøtta
• vektleggje ei mest mogleg berekraftig verksemd, jamfør FN sine berekraftsmål, og ta særskilt omsyn til klima og miljø
• arbeide langsiktig og strategisk for å fremje mangfald og likestilling